اسكيمو عيونك يا حبيبي
وانا قلبي أغسطس ولهيبه
صورتك في كلامي وتقليبي
راضية صورتي باللي تجيبه
وانا ياما بحاول وباهاتي
ولا تلفت نظرك حواراتي
ومواني جناني وحالاتي
ولا رعشة قلبي ومكاتيبه
هى ف وادي وانت ف وادي
كان نفسي أكون وش الفنجان
بتبوسه بحب و ع الهادي
كان نفسي ماكونش الولاعة
تنساها ف أى مكان عادي
مفضوحة عيوني ع الآخر
مش واخد بالك منها ازاى
كل ما ترسالك بتسافر
واستنى معاد القطر الجاى
ومحطاتك مالهاش آخر
مفضوحة عيوني ع الآخر
وانا قلبي تذكرة مقطوعة
وجيوبك مليانة تذاكر
وانا نفسي يكونلي جيب فاضي
لو بس أكون وش الفنجان
بتبوسه بحب و ع الهادي
لو بس ماكونش الولاعة
تنساها ف أى مكان عادي
وكفاية الضحكة المكشوفة
والنظرة الحلوة المكسوفة
مش لازم بالصوت المعلن
لو قلبك عايش كازانوفا
يكفيني أكون وش الفنجان
بتبوسه بحب و ع الهادي
وياريتني ماكونش الولاعة
تنساها ف أى مكان.. عادي!