بصيت لبابي المتزخرف بالأرانب
الوانه باهتة سايحة في خيوط العناكب
مقفول وساكت ترباسه شابك
شروخه زي مرشد تايه بالأجانب
و عين سحرية مستحية انها تفتح
و جرس أخرس رافض للمزيكة يسمع
و ايد الأكرة عايزة بكرة علشان تقوم
حتى الكالون بيثبت نفسه يوم عن يوم
تراب ع اليافطة عايش بيأكد غيابي
والضهر جاهز للفرصة اللي تدق بابي
موجود قدامي ولا في عقل بالي
ولا الباب ده فعلا صورة مرسومة ف خيالي
طب مين اتغلب مين الجاني انا ولا الزمن
مين الصح مين الغلط مين يدفع التمن
و ييجي الوقت أفكر أحاول 1000 مرة
مسيري في يوم هكسر الباب واطلع برة
ولسه العقدة في لساني ملازماني في كل مكان
وكل طريق بيرسمني على الهامش بدون عنوان
و لسه ع الحيطان عايشة شروخ الماضي مش بتزول
يتوه الحلم جواها وفي الآخر يموت مقتول
بصيت لشباكي لقيته مليان شقوق
وضوء مرسوم على شكل واحد مشنوق
ماسك فى ايده لعبة مكتوب عليها مظلوم
ضمير مش قادر يقوم احلام عايشة في غيوم
فجأة الضوء اتحول لشوية وشوش
و كل وش فيهم من وراه كابوس
كابوس ورا الكابوس حتى لو مفتح عيني
محبوس جوه فانوس و البراءة مش هتجيني
مش كل ايد إتمدتلي ناوية تساعد
ولا كل واحد اسمه فرصة هيفضل قاعد
كل اختيار اخترته اداني ضهره
حتى شباكي لما فتحته رفضني برضه
بصيت من تاني لقيت ستايره مقفولة
على كل درفة منه حكاية مقتولة
اسماء مشطوبة احلام مكبوتة
لكن هيجي يوم والعب دور البطولة
ولسه العقدة في لساني ملازماني في كل مكان
وكل طريق بيرسمني على الهامش بدون عنوان
و لسه ع الحيطان عايشة شروخ الماضي مش بتزول
يتوه الحلم جواها وفي الآخر يموت مقتول