احتاج لك حاجة غريبٍ للاوطان
ضاعت حياته بين ديــره وديـره
اشتاق لك أحيان وأحيان وأحيان
والفـكــر يمــك كــل يــومٍ أديره
ولهان أشوفك صدق ولهان ولهان
وأفـز لا جــابـوا لك الناس سيره
أقوم واقعد والتفت واسهر أحزان
وجروح قلبي من غيابك خطيره
احبك بصمتي واحبك بالاعلان
وماهمني كثر الكـلام وقصيره
أنت المهم وأنت الأهم وين ماكان
وأشياء لك في وسط قلبي كبيره
ياكثرهم حولي من فــلان وفــلان
وماغيرك اللي له عيوني سهيره
شافوك في عيني وحبك لهم بان
شافوك وماتوا بين حيره وغيره
غنيت لك أحلى كلامي والألحان
وغنيت لك شــعرك وغنيت غـيره
من كثر ما احبك ترى الكل زعلان
هـم كـيـفهم كـلـن يحـكم ضـميره
حبك في دمي باقيٍ كل الأزمان
كل مـاذكـرتك نبــض قلبي يثـيره
أنا حبيبك وأنت لي اصدق إنسان
بيني وبينك حــب واشيا كـثيره