كان نفسي أطلع سافل أو قبيح
يا مصر زهقت مـ التلميح
وأنا اللي في مشاعري
وكلمتي
وشعري
تملّي صريح
مش لاقي ليا فيكي على مقاسي ضريح
ولما مُت يا للعجب محضرتش الدفنة
ولا حسيت بالتعب
وساعة لما جُم يبصموني على التصريح
ماكنتش فصيح
يا مصــــر كان نفسي أطلع سافل أو قبيح
كفاية بقى زهقت مـ التلميح
كفروني شيوخك الكدابين
خرجوني من الملة
وقالوا عليا بلا دين
رغم إني بيكي آمنت
وبوحدتك سلّمت
وصلّيت في رحاب سيدنا الحسين
وإنتي متأكدة
وعندك دليل
ريقي اللي ناشف حطب
وإنتي مجرى النيل
مافيش في جيبي شلن
ويقولوا قال تمويل
يا مصـــر يا صوتي
ووحدتي
وصمتي
ولحظة ثبوتي
يا قبلتي
وغربتي
وكلمتي
وموتي
من ورا قلبي
اللي عاشقك في الضلام والنور
عاشقك مُخيّر
مانيش مجبور
أنا بندهك
ماتقطعيش النور
في القلب لسه جراح
في القلب لسه كسور
واللي باقي مننا
زيِّ اللي راح
مابيكتبوش دستور