ما بقاش فاضلى فى قلبى غير دقة بينى و بين خط الحياه زقة
قلبى ما يملكش إلا كلمة آه غصبوه عليها لما قال لأ
عايش حياتى بص قلب عجوز لابس على وشى قناع أراجوز
دورت على حظى كتير يا حياه قطر الحظوظ كله طلع محجوز
موجوع و ضهرى محنى من همى راح العسل و الشهد من فمى
و سكن مكانه مر طعم الصبر والدنيا مستحليه كسرتى و همى
جيت الحياه ماكانش ليا ذنب ورضيت أنا أعيش دنيتى على جنب
الستر كان أخر حدود حلمى أتاريه فى أيامنا خيالى و صعب
الناس تشوف وشى تقول قادر وتقول حويط فاجر مالوش آخر
وده وش عيره لابسه و أنا مطحون بعمل لنفسى م الوحوش ساتر
ما بقتش عارف نفسى هوا أنا مين أبن الملايكة ولا أخو الشياطين
أوقات بخاف منى على نفسى ما أعرفش وخدانى و رايحه لفين
موجوع و ضهرى محنى من همى راح العسل و الشهد من فمى
و سكن مكانه مر طعم الصبر والدنيا مستحليه كسرتى و همى
جيت الحياه ماكانش ليا ذنب و رضيت أنا أعيش دنيتى على جنب
الستر كان أخر حدود حلمى أتاريه فى أيامنا خيالى و صعب